ZZRACCONTI del Campidano/o
/ 0
Dettagli
- Dettagli
- Pubblicato Lunedì, 17 Aprile 2017 16:45
- Scritto da Giuseppe
- Visite: 1339
Custu est su contu de Peppineddu Masaboccu.
Tziu Giuanni e tziu Chicchinu (Kikkinu), maistus de linna e cassadoris
Sa gent’’e bidda no iscit ancora cali, de is dus, fessat su prus tzaccadori de ballas. De is tantis istorias chi de issus si contant esti cosa meda fadiosa de intzertai cali èssada sparau is prus mannas.
Tzia Maria, sa mulleri de tziu Giuanni naràt sempri a is gomais ca cun is padellas de cassa dessu pobiddu si fiat fatta tottu sa batteria de coxina, e cali batteria: prus de cinquanta, tra pinjadas, tianus, padellas, scobadoris, salattieris, tziccaras e tziccaronis, imbudeddus e fintzas sa pinjada a pija e tottus a duas e tres manigas.
Tzia Rosa, sa mulleri de tziu Chicchinu (Kikkinu), invecis, a is gomareddas suas, naràt fisciu ca no fetti issa sia fiat fatta una bella batteria, cun is padellas de tziu Chicchinu, ma is setti fillas femminas ( grazias a Deus jei ndi iat tentu 12 de fillus, setti femminas e cincui mascus), tottus coyàdas beni e cun bellas codroxinas de pippius, no iant mai comporàu mancu u’ tianeddu, ca est pagu, e tottus teniant batterias de genti sennora.
De tottu is ballas chi is dus maistus de linna sparànta, deu imoi si ndi contu una…
Tziu Giuanni e tziu Chicchinu (Kikkinu) traballànta in sa buttega matessia e babbu, ca issu puru fiat mestu ‘e linna, andàda a innìas po smacchinai su linnamini e deu dhi fadia cumpanjia, avattu ‘e issu, ca dhi fadia de scienti.
Iat cumentzau tziu Giuanni:
“ Domigu fiat in su pranu ‘e Toguru, cun Habistu, su cani po perdixi, ca ndi scia unu bellu bollideddu. Tott’in d’una Habistu mi nci hat iscobiau dus sirbonis, mascu e femmina, mannus che bois. Imbratzu sa scupetta e fatzu fogu duas bortas: croccaus tott’a is dus pegus. Jessu, cantu fiant mannus! Dus happu carriaus a coddu tott’a is dus e ndi seu cabau a bidda, passendi in su sattadroxu de Prameri, a genn’e Muxerru, a genn’Erbeis, ndi seu cabau in s’arrieddu callenti a sa ia ‘e Perd’’e Pibara y a bidda. Ma fia straccu lobai! Tzertu hanti pesau noranta chilus perunu”!
Deu ingunis fia ascurtendi, ma no ia musciau, poita po is pippius no si ndi giuàda de arrespundi a is mannus!
Insandus iat sighìu tziu Chicchinu (Kikkinu):
“ Lobai oh! Gopai Giuanni, deu invecis domigu no seu andau a cassa, ca tenia de preparai su srementu po s’aradura in sa binja de su Pedriaxu. De cumenti happu abertu su jassu de binja, happu appubau una perdixi in mesu ‘e s’erba, mi seu incrubau po ndi bodì una perda e nd’happu boddìtu una cuaglia, nci dh’happu sparàda assa perdixi e d’happu morta; insandus bia conillus bessendi de u’ cugutzu de arrù, happu accanciau una pertia e cumentzau a scudi a conca de cumenti bessiant. Nd’happu prenu dus saccus. Tott’in dh’una happu intendiu unu iaxi de murrungius; lampu fiat unu tallu de sribonis, mannus e pittius, tott’imbideraus fiant benendi derettus a mimi cun trassas pagu bellas. Mancu mali ca happu acutu de nci pesai assa matta ‘essa pira, o sinuncas it’arrori mannu po mimi”! E funti abarraus ingunis oras y oras, fintzas chi si funt arroscius e si ndi funt andaus. Deu insandus happu accanciau is saccus cun is conillus, sa cuaglia e sa perdixi e seu torrau a domu, tanti no dho iat prus ora de fai su srementu”!
Appustis chi iat contau su contu, Peppineddu Masaboccu,
torrau fiat a domu, cun dhu’ cibiru ‘e binu e u’ frascu ‘e pistoccu!
Peppi
diritti di copyright - Giuseppe Concas -nominis.net